PHULLEN VENGTHAR KOHHRAN LO PIAN CHHUAH DAN CHANCHIN

Phallen Vengthar tih hi tun hma chuan chuan Himunthar tih a ni thin a. Kohhran hming sak a lo nih khan Phullen Vengthar Kohhran tih a ni a, chu chu tun thlenga a hming a ni ta a ni.

Phullen Vengthar hi Phullen (Khandaih) hmar lama awm a ni. Kum 1973-ah Phullen Vengthar (Hmunthar) hi kai tan a ni a. Hemi kum hian mi tlem tê an kai a. Phullen Biak In a hlat avangin inkhawm kal a harsa em em a, chuvang chuan mumal lo takin kum thum lai an awm a, nu leh pa thahnemngai tak takten hetia awm reng hi tha ti lovin Phullen Upate hnenah Sunday School nei ve turin an dil ta a. Tichuan Phullen Kohhran Sunday Sikul enkawi turin Beginners Department chu neih a ni ta a. Mahse a enkawl zui hleithei lova, tawp mai dawna a lan avangin naupang lama thawksa Vengthar lama awm Pu Lianthunga leh NI. Thanghmingliani te chuan kum 1976 atangin kum hnih chhung an enkawl a, kum 1978 kumin Pi Remkimi chu thawk ve tura sawm a ni a, an thawkho ta a ni.

Hetih hunlai hian mimal inah leh sikulahte an inkhawm kual vel thin a. Phullen Kohhran aṭanga enkawina chu a mumal ta lo nen, a tawp mai tur chu ngai ngam lovin Pu Lianthunga chuan neih zuipui zel a rawt a, a rawtna ang chuan neih zuipui zel a ni. Kum 1980 atangin Junior Department thleng neih a ni ve ta a. Hetih laia naupang lama thawktute chu heng mite hi an ni:-
1) Pu Tlantuliana

2) Pu Lalchuanga

3) Tv.Nunhlima
4) NI. Lalrinthari

5)Tv. Lalrinmawia

6) Tv. Zasanga
7) NI Vanlalzeli

8)Tv. Lalhmingmawia (Dept, pumpui ziaku)

Kum 1976-ah Puitling lam Sunday Sikul nei ve turin Phullen Kohhran Upate an dil a. Hemi kum April thla atangin zirtirtu Upa Tlangthanga hovin puitling Sunday Sikul chu neih tan a ni ta a, Pu Vankima inah an inkhawm thin. Dar an la neih loh avangin in neitupa Pu Vankima chu a au loh leh bawngtuthlawhte an vaw thin. Inkhawm hruai leh ziaktu hna hi Upa Tlangthangan a kawp a, Treasurer-ah Pi Lalringngheti a ni. Kum 1977 atangin kum khat chhungin Rs. 25/-an tlin a ni.

Pu Lalsawivela, Pi Lalawii leh Upa Sawithanga te chu puitling Sunday School enkawl tura ruat an ni. Sunday School inkhawm hi a rei deuh thin a ni ang, inkhawm duh lote pawh an awm nual a ni. Sunday School ziaktu atan Pu Ngurdailova leh Tv. Thanenga te lak an ni. Inkhawmna atan hian school, Pu Vankima in leh Upa Sawithanga in an hmang thin. Hemi kum vek hian Beihrual inkhawm pawh Upa Sawithanga inah Upa Tlangthanga hovin neih tan a ni a, Laltrin-te an chhi thin.


Hun a lo kal zel a, mite an lo pung hret hret a, Kohhrana mi thahnemngaite pawh an lo thahnem ve tial tial a, Kohhran Committee chuan Sunday School pawh mumal deuh a neih chu thain a hria a, Phunglaia hmun tlangah thingtuai In-in Sunday School Hall sak a ni ta a.

Kum 1980-ah chuan Kohhran Committee chuan Vengthar lamah Sunday School mai ni lovin, Pathianni chawhma leh zana inkhawm hrante pawh thain a hria a. Pathian mite rilruah, Biak In thar sak duhnate pawh a lo awm ta zel a. Biak In hmun tur Pu Lalengmawia, A.O. te hian Phunglaia hmun tlangah an tifel ta a ni.

Biak In hmun tur diltute chu heng mite hi an ni.

1) Pu Vankima
2) Pu Panghnuna

3) Pu Tlanhlira

4) Pu Thavapa
5) Upa Lalzawmliana

6) Pu K. Hnehthanga te an ni.


Biak In tha ve deuh chu sak chakna a lo awm ta zel a, thingte zaiin a theih ang angin thawhlawmte khawn zel a ni a. Tichuan, ni 30.11.1981 Thawhtan niin Biak In hmun tur laih hnatlang hmasa chu Upa Ramzauva'n Pathian hnenah a hlan a, a hlan zawhah lei laih hnatlang chu neih tan a ni ta a ni. Hemi kum 1981 hi Vengthara Krismas hmanho hmasak a ni a, ruai nen hlim takin an hmang a ni. Ni 28.12.1981 Thawhtanniah Biak In hmun laih hnatlang chhunzawm leh a ni a, Pu K. Hnehthanga'n vawk sum nga (5) a thawh a ni. Biak In thar tur ban chu ni 10.3.1982 Nilainiin phun a ni a, Kohhran Upate leh Building Committee leh Hmunthar Veng mi thahnemngaiten bul an tan a, mistiri hi Pu Saihnuna a ni

He Kohhran hi Sunday School-a bul tan a ni a, atirah chuan mi tlemtein hun harsa tak hnuaia rawng lo bawlin tunah chuan Kohhran Sunday School puitling takin Pathian malsawmnain a ding ta a. Kohhran member-te atangin kawng hrang hranga M.S.S.U chawimawina dawngte pawh an lo awm ta hial a ni.

Phullen Kohhran Committee, ni 30.3.1980-a thu chuan Hmunthar Veng Preaching Station chungchang a sawi chu pending a ni a, ni 15.1.1981-ah Preaching Station chungchang hi sawi nawn leh a ni a. Kohhran Committee chuan Presbytery-ah Hmunthar Venga Preaching Station siam chungchang hi a thlen ta a. Kum 1981 Presbytery Phuaibuangah neih a ni a, chutah chuan Presbytery Moderator chuan Kohhran mal pawhin, Bial Inkhawmpui pawhin, Preaching Station hi siam theih a nih thu leh Presbytery-ah dil a ngai love a tih avangin Hmunthar Veng chu Preaching Station-a siam turin a inbuatsaih ta a. Ni 7.3.1982 Chawlhni zan inkhawmah Hmunthar Veng chu Preaching Station a ni tih puan a ni ta ni. A hawnna programme pawh siam a ni a, hetiangin

Pawnlam Programme:

Hruaitu leh hawngtu : Pastor C.M. Zalenthanga (Suangpuilawn Bial Pastor)
A hun : Dt. 4.7.1982 (Dar 10.00 AM)
Bible chang chhiar leh tawngtai
Hla (Kristian Hlabu No. 36) : Lalpa thehdarh ang che
Hawnna : Pastor C.M. Zalenthanga

In Chhunglam Programme:

Chairman : Pastor C.M. Zalenthanga
Bible chang chhiar leh tawngtai : Pro Pastor K. Lalhmuchhuaka

Zaipawl : Kohhran zaipawl

Biak In sak dan report : Upa Ramzauva
Lawmthu sawi: Upa Ralthuama
Thuchah . Pastor С.М. Zalenthanga

Hla (Kristian Hlabu No. 275) : Krista Kohhran tan kan ding
Banna : Malsawm tawngtaina

BIAK IN THAR SAK ṬAN A NI:
Biak In thar ban phun Dt. 10.3.1982 (Nilai) niah neih a ni a. Kohhran Upa leh Building Committee leh Hmunthar Venga mi tlawmngaiten bul an tan a. Ni 15.11.1981-a Kohhran Committee chuan Biak In thar sak turah Sub-Committee din thain a hria a, heng mite hi an ruat a ni

Chairman :  Upa Ramzauva
Secretary :  Pu K. Hnehthanga
Treasurer : Pu Thavapa
Member : Upa Lalzawmliana, Pu Saihnuna

Hmunthar Kohhran chu Kohhran puitlinga hlankai a tha tawh lawm ni tih chu Phullen Kohhran Committee chuan ni 17.2. 1983- ah a ngaihtuah a. Presbytery-ah thlen nise a ti a. Presbytery remtihna angin ni 6.11.1983 Pathianniin Kohhran puitlinga hlan hun tur chu a ruat ta a ni. Kohhran hming tur hi ni 16.10.1983-ah sak a ni ta a, Phullen Vengthar Kohhran tih a ni ta a ni. Kohhran puitlinga hlan a nih dawn avangin Biak In zauh a ngai a, ni 12.11.1983 Inrinniin Biak In zauh hnatlang neih a ni. Kohhran puitlinga hlankai ni, Kohhran Committee-in a lo ruat ni 13.11.1983 Pathianni chu Kohhran pui lam chawhma inkhawm leh chawhnu inkhawm Biak In kharin hman a ni ta a.

Tichuan November ni 13, 1983 Pathianni khan Phullen Vengthar Kohhran chu Kohhran puitling a lo ni ta a ni. Kohhran puitlinga hlanna neitu hi Pastor C.M. Zalenthanga a ni a. Tun thlengin Phullen Vengthar Kohhran chu Kohhran nung tak a ni ta zel a ni.

(Hei hi Upa R. Lalnunmawia ziak atanga lak, kaihtawi a ni - Buata Bawihtlung)